Omicron在港肆虐，政府宣布於1月7日起，餐廳晚上6時後禁堂食外，戲院、美容院、健身室和所有大型活動如演唱會等，亦要停開；雪上加霜，當刻因圍封的葵涌邨疫情爆發，多個行業能否於年初四後啟市，仍存隱憂。
對於「十四日又十四日」防疫措施，遭受牽連的各界別人士，無奈之餘，很多苦只有自己知，其中開設樓上美容舖Q Beauty的老闆娘Helen，感受至深，皆因她的店舖甫開張一星期，便被迫要暫停營業，猶幸樂觀開懷的她，仍未喪志，更寄語大家：「真係要撐住，同佢鬥長命！」
現已四字頭的Helen，十四、五歲便入行從事美容業，經驗資深，眼見家中孩子已長大，早前便決定創業，在石門開設樓上舖Q Beauty，主力為客人做facial，同時於網上售賣護膚品。
「我間舖2021年12月31日先開張，仲請埋人，我本來都雄心勃勃㗎，點知轉頭就話要lockdown！冇辦法，所有booking都取消晒，唔敢做呀，費事有乜嘢事就得不償失！呢行每到年尾先最忙，個個都要扮靚、『洗邋遢』過年，𠵱家要你停就停，成個美容業界都好大鑊㗎！」
最無奈是舖租還要交的。「我𠵱家要交萬幾蚊租都嗌晒救命，有啲商場舖嘅美容院，起碼要交五、六萬，真係慘㗎！」至於政府為停業各界推出的「抗疫基金」，她又未知能否受惠。「美容業要2月7日先開始申請，但我公司仲新，未有戶口，又未有強積金，都唔知申唔申請到。𠵱家我只可以兩、三日返去公司做吓清潔，賣吓mask吊命，賺唔到錢㗎，因為啲價錢太公開，唔可以賣得貴。」
問Helen於「十四日又十四日」的停業措施，可有點算損失，她坦言「計唔到」，因Q Beauty 的facial服務，是以單次形式收費。
「以前美容院都要啲客開course，啲客聽到都驚！𠵱家變遷咗，今日唔知聽日事，你今日嚟可能要做水份（facial），下次嚟可能要做美白，所以我只會做單次，唔需要你劈價，我亦唔會收得平，因為我有我專業，啲客OK嘅、覺得舒服嘅，咪嚟幫襯囉，最緊要過得人、過得自己！」
慶幸她多年來「儲」了一些好顧客。「啲客嚟幫襯，可以吹吓水，就算有啲嘢大家睇法唔同，我都會學到嘢。佢哋好好，好多都同我book定初四、初五嚟做——雖然（能否啟市）一切都仲要睇政府。」
人情味滿滿，難怪她即使未知店舖何日啟市，心志仍然實實淨淨。「話停業嗰日，我收到好多客嘅電話關心，我話：『得啦，天會安排條路俾我行！』呢個時勢，生活點都要過，冇得唔樂觀㗎！呢兩年每一行都難過，但你𠵱家依然存在，仲喺度呼吸緊，你咪當賺咗囉！你日日鬧、日日嬲，盞自己生皺紋，又瞓得唔好，所以大家真係要撐住，（當下時勢）唔會死人嘅，希望在明天，咪同佢鬥長命囉！」
Komentáře