《IT狗》備受熱捧，除了因為劇情既勵志、熱血又搞笑外，更因為題材和對白夠晒貼地。
Tecky Academy（科啟學院）的兩位創辦人劉光曆（Alex）和劉偉中（Gordon），亦大讚此劇夠寫實。「我終於可以同阿媽、太太講我做緊乜，哈哈！」Alex說。而Gordon甚至認為此劇為IT從業員吐了一口烏煙：「可以話係香港第一套講IT人形象唔係負面嘅劇！」事實上，在這個變化步伐急速的AI時代，IT界人材需求與日俱增，Alex和Gordon早於18年創辦此學院，便開辦了為期16周的Coding Bootcamp課程，培育programmer，讓「IT狗」也有出頭天。
跟《IT狗》的角色一樣，Tecky Academy的兩位創辦人Alex和Gordon，其實也不過是三十出頭的青年人，開設16周的全日制Coding Bootcamp課程，同樣幹勁十足。
「呢個模式係有咁intensive得咁intensive，一開始就已經教佢哋career實際要用嘅嘢，又會要佢哋整project，所以讀完十六個禮拜，就可以直接入行。」Alex說。「同學第一日入嚟讀開始，讀嘅嘢都係現實呢行做緊嘅嘢，我哋唔會同你整花巧嘢。」Gordon在旁補充。
他們坦言，這兩年因疫情關係，全日制課程經常很快便告爆滿。「有好多人要work from home，又有好多人失業，大家就會諗有乜嘢可以home office，然後發覺coding係一個好強嘅advantage，既係專業，但又可以remote咁做嘢，冇cert攞、冇牌考，亦都冇silver bullet——即係你學識呢套嘢，跟住
仲要keep住更新，係一個on going process——呢點我哋都會同同學講得好清楚。」
Tecky Academy 於18年創校，由荃灣總部開始擴充，再於上環開設分校。「初初開始時，香港人唔係好信Coding Bootcamp，所以我哋冇expect過會有𠵱家呢個規模。」Alex笑着說，在旁的Gordon亦接着道：「有啲同學讀完我哋個課程搵到工，會返嚟分享；有啲仲去埋海外做programmer，有晒真實個案，我哋先唔使再講：『信我啦！』哈哈！事實上，全球一直都好缺programmer，淨係香港都不斷有數以千計嘅空缺，所以學咗真係唔會冇工搵。」
院校至今已培育逾五百名學生，年齡層很闊，由17至60歲不等，有男也有女。Gordon對此很有看法：「香港嘅教育通常去到大學就完，概念係：最緊要考好個公開試。一個廿幾歲考嘅試，會影響人嘅一生，好奇怪囉！呢個世代唔係咁。」Alex點頭認同，說出了創校的理念：「有27、8歲嘅同學問我哋，𠵱家先嚟學會唔會老。其實無論幾多歲，大學之後，點解冇諗過學多樣求職技能？點解唔可以俾人有第二個機會、第二個career呢？我哋開呢間學院就係想幫呢啲迷惘嘅人。」
感同身受，只因Alex和Gordon都曾經迷惘過，他們本科都並非IT。前者原是讀會計出身。「讀完會計，如果入唔到big 4，其實同做會計文員差唔多。我考咗會計師牌，亦都apply晒big 4㗎，但final stage冇我份咋嘛，哈哈！」逐被前拍檔推入IT坑。「我嗰陣都有少少興趣programming，我舊partner猛同我講有得做，咁我就把心一橫，開公司寫app！點知捱吓捱吓，又寫到喎。
「大家都會諗：我係咪做緊自己鍾意嘅嘢？我做緊乜嘢呢？我讀咗咁多書，都係咁咋？冇人會話好鍾意做會計，核數俾到自己好大成功感㗎嘛，哈哈！我諗後生仔唔係冇路揀。」
而Gordon的本科則是物理。「我嗰陣係做做吓嘢，發覺自己鍾意做programming，多過自己做緊嘅嘢，我唔想每日返公司，都好憎做緊嘅嘢，咁啱又有人肯俾錢我做，非常好！咪向呢方面發展囉！」
故此，對於劇集《IT狗》，他們看得很有共鳴，甚至感覺一雪「IT狗」此名的前恥！Gordon不諱言：「某電視台幾廿年嚟，都係以負面方式去展示IT人，有套劇嘅IT人角色，仲叫做『Keyboard』，離晒譜！乜事呀？」「我哋行內有個笑話，就係上網search『IT男』三個字，都係同風化案有關！殺人嗰個都叫『金融才俊』，點解唔可以係『IT才俊』、『金融男』呢？」
Alex亦憤憤不平：「以前一話IT，啲人只係覺得好毒，你哋只係打機咋嘛！行外人會將西洋菜街賣寬頻、黃金商場賣mouse、喺SPACE X研究火箭嘅，都歸納叫做『IT』，加埋『IT狗』呢個名嘅出現，形象好負面。」此時Gordon忍不住插嘴：「仲有08年金融海嘯，匯豐炒人，一定係炒IT部，嗰嘢形象真係直插谷底！所以《IT狗》呢套劇咁正面去講IT人，真係好難得！」Alex十分認同：「我哋都真係見過曾俊華同星之子㗎！我哋有次招聘show case，星之子都有嚟，甚至請咗我哋啲同學！我同阿媽、太太之前唔知我做緊乜，𠵱家都有多個話題講，我係做緊《IT狗》呢啲嘢㗎！哈哈哈！」
機會果然係留俾有信念嘅人。
即上了解更多：
