武漢肺炎重創本港經濟，不少抗爭者在「疫市」下求存。有大學生為幫補家計，去廢料工場拆解金屬，肺部懷疑受粉塵和有毒化學物損害，現時連行斜路都會喘氣。讀聲樂少女去年11月因為中彈休養兩個月，身體康復後遇上疫情，為了賺學費和生活費，在黃店餐廳日做11小時廚房。「我要返工」良心平台負責人「Pop巴打」指，受疫情影響，近月職位空缺銳減8成，「好多手足嚟搵我哋，但我哋都係愛莫能助。」
「Pop巴打」曾任職社工，去年中與幾個朋友成立「我要返工」平台。他指，去年11月抗爭活動高峯，單月曾收到868職位空缺，很多僱主不介意增設職位聘請抗爭者，甚至有一群中產太太聘請抗爭者洗車。但隨武漢疫情爆發，今年2月只有127份空缺，跌幅逾8成，「以往良心僱主，去到2月時候佢成間舖已經執咗笠、消失咗。」現時很多零售、飲食小店亦都艱苦經營，昔日增聘職位亦都取消，「最多回覆就係對唔住，我哋其實自己都經營困難，或是我哋就快做唔住。」
金屬拆解員每日吸粉塵
身體毛孔被堵頭髮流黑水
疫市下職位難求，抗爭者惟有做高危工作。大學生Leo（化名）曾經有一份穩定兼職，有一次忍不住反駁「藍絲」老闆，結果失去工作。他今年初應徵一份金屬拆解員，在新界偏遠工場拆解金屬廢料。他憶述，當用切割機分解金屬塊時，會傳出濃烈機油味、天拿水和有機化學味，金屬塊在切割後會放入機器粉碎，產生大量金屬粉塵，「佢可以大塵到連能見度一米都見唔到。」Leo很深印象是第一日上班後，脫下長褲，大腿的毛孔被粉塵堵塞，全是黑色一點點。
Leo自嘲，每日下班後都不似人形，頭髮沾滿粉塵糾結在一起，兩次洗頭都流出黑色污水，防塵面罩使用兩日，濾芯已經積滿粉塵。工場流失率極高，幾乎每日都有人離職，隔幾日又有人因為經濟拮据加入，賺取800元日薪。Leo說，家人在疫市下失業和停工，自己要分擔經濟壓力，已經堅持做了近兩個月，近期行斜路也覺得喘氣，懷疑肺功能受損，「你都唔知吸咗乜落個肺度，你完全唔知個肺係乜環境。但係無計，為咗生活都要頂落去囉。」
理財顧問失業轉做7仔
廚房兼職亦不保
經濟寒冬下，一些高收入抗爭者都要向下流動。90後John是理財顧問，在運動爆發前月入最高5、6萬元，經常出入商業區見客。他在去年6月起全身投入逆權運動，幾乎沒有缺席任何一場抗爭，「出嚟之前掙扎好細，因為我覺得良心感召大過好多物質上利害關係。」投入抗爭令收入銳減至每月數千元，為了維持生計，他選擇跨區做夜間7-11店員，「唔使同人交代咁多，好似阿John仍然好正常過緊佢日子。」
John擔心撞見熟客或朋友，盡量做執倉、後勤工作，「我有個擔心就係大家唔會體諒你情況，同埋我覺得要交代都唔係一件易講事。」去年市道轉差，John失去便利店工作，當時他仍抱有信心，「唔做呢份就搵其他囉，我7仔都肯做，有乜搵唔到？」今年初他在黃店餐廳做廚房兼職，卻遇上武漢肺炎襲港，「（客人）真係跌咗7成左右，原本晚晚無停手，變咗返去企。」餐廳老闆選擇保住長工，John又再跌入失業境況，要再重新求職。
黃店成疫市避風港
添職位聘更多抗爭者
疫市下仍能堅持的黃店，成為很多抗爭者「避風港」。讀大專的Amy（化名）去年被政見不同補習社老闆解僱，去年底更因為被催淚彈擊中要休養兩個月。她指，自己一直靠兼職維生，「升上大專時候，當時屋企人已經唔幫我交學費，當時第一期學費係我班主任借畀我。」今年初她幸運在一間黃店餐廳找到工作，每日最長工作11小時，負責買食材、處理材料、送餐、收餐、洗碗和埋數，「去到（夜晚）7、8點你已經係，你個人體力開始不受控制，你會想舂眼瞓。」
老闆為了讓更多抗爭者有工作，盡量平均分配兼職工時。現時Amy每周工作3、4日，有時被調派去調配飲品，每日可賺約600元。她指，收入僅僅夠生活，疫情下她仍堅持自己理想，目標在今年內考獲聲樂8級，現時每周都會上聲樂課，每堂學費350元，「返一日半（人工）大概學到兩堂。」
她說，疫情煞停抗爭，很多抗爭者未能回復到「正常生活」，自己亦一度很迷惘，最近慢慢明白最重要是先照顧好自己，等待下一個抗爭時機，「當嗰一刻你知道要出去（抗爭）時候，你依然會出去，已經足夠。而唔係強迫自己喺一個自己未顧得掂自己情況下，依然要去令件事繼續。」
黃店生意跌三分二
老闆寧自己減薪拒裁員
疫市下黃店艱苦經營，深水埗「甜一刻」負責人鄭先生指，近日政府推出「隔枱」和限聚令後，生意較高峯期大跌三分二，靠外賣彌補。他指，店內8成員工都是抗爭者，有員工見客人大減，主動要求減少工時。甜品店現時雖然未到告急，但鄭先生率先將自己每月在店舖的支薪減半，盡量保住員工生計。
鄭先生指，自己去年中頂手店舖，全職打理店舖，隨後爆發逆權運動，黃色經濟圈冒起一度令生意額增加。但疫情成為生意轉差轉捩點。近日港府要求「隔枱」，店舖由22張枱縮減至11張枱，又推出限聚令，「試過一晚可以（生意）差到員工話好悶，想搵啲嘢做。」有員工甚至主動要求減工時，幫老闆節省人力成本。
鄭先生指，疫市下不會裁員，只是員工平均工時會縮減。他慨嘆，近期多了抗爭者敲門求職，自己都未能提供更多職位，「真係講個捱字，大家努力捱過呢段時間。」他呼籲，支持黃色經濟圈的市民，應多關注告急小店，自己之前都光顧同區告急黃店「金芝龍」，「大家都平均分散幫襯唔同小店，唔好一窩蜂支持好大黃店，留意返小店都出心出力做好多嘢。」