昨日，有一班年輕人（暫時），因為覺得不忿氣，覺得做嘢唔一定係咁樣做，覺得拍片做媒體唔一定係咁樣拍，覺得唔一定要走，覺得要拍出活著的勇氣，他/她們在九展搞咗場show，好好睇，好感動，一場接近四小時但物超所值的show。
.
下午場，有一幕的，就是接近完場時（原來未），一眾幕前演員一字排開，身穿白色西裝，面向歡眾；然後，坐在後方就會見到，全場 standing ovation ，起立鼓掌，表達心中的那句 #respect （後來大家少少尷尬咁坐番低的，因為原來仲有好多感言要講，好笑；但你大約知精彩到咩水平） 。
.
記得幾日前，在一個青年講座上，有觀眾問台上幾位接觸很多青年的創業家：「應該點樣牧養年輕人？（按：因活動是基督教活動，牧養一詞廣東話翻譯一下，大約就是與年輕人同行）」我類似答：「其實就係比番機會同平台年輕人，在大家的公司、教會、各類場景，去試去發揮去創造，唔好下下都干涉，下下用老油條的角度，告訴年輕人咩都唔可能。」
.
我記得平台有一次，與一所英國公司開商務會議，介紹我們的工作；年輕同事們在Powerpoint，用上網絡上的Memes，去作自我介紹。OK，第一時間比我Ban咗。之後，同事們向我反映，他/她們做了很多research，指出這間英國公司的文化，是比較開放的，是跳出框框，他/她們覺得這件事是可行的。Ok，就試下，冇咗呢個客，平台繼續可以前行的。結果？會議很順利的，但英國公司最終沒有和我們做生意，但冇咩緊要，都唔係最重要了。
.
又，昨日，有機會與在不同團體工作的朋友見個面。有朋友問平台，我們是如何轉型成社商合一，做想做的青年工作，又能賺錢維持運作。然後，我就分享我們的經驗，如何得到很多有心人的幫助、如何在錯誤中學習、如何由零開始學習社企式賺錢生存，又保存服務社會的理念。
.
有趣，最後，朋友們還是一臉迷茫，覺得做生意好難、覺得唔work、覺得自己唔係咁樣的材料、覺得從來民間團體不是這樣運作云云。不過，可能就是差在踏出個一步，去試當真，去試下做錯，去試下關公，然後冇人知聽日事，可能有時可以成功。畢業，一年前，冇人覺得「試當真」係一個Channel名，呀，甚至將來係一套電影。
.
Pop巴打
平台創辦人